احوالات دیر راهب
قلم الیمده دایاندیم زمانی طولانی
سینمده بغض گلو گوزده اشگ سیلانی
اورکده واردی بیوک بیرمصیبته نیت
نه نوع شرح الیوم من بو غملی جریانی.
اولده حضرت حجتدن ع اعتزار ایدورم
بغشلسون اوزی چون خاطرین فکار ایدورم
کمک لیق ایلیه بومطلبین کتابتینه
رضای خاطرینه گوزیاشین نثارایدورم.
بلا چولونده نجه قالدی بی کفن باباسی
نجه جنازه یوخیدی سایلمیان یاراسی
قالوبدی اوچ گونی اوایستی قوملارین اوسته
توکر سرشگ ترین چوللری گزن بالاسی.
قالوبدی باشسیز اوعالم لره اولان سرور
سالوبدی مقتله باشسیز جنازه سی لنگر
ولیک ایستمور آتسون حرملرون گوزدن
جدانون اوسته اولوب اهل بیتنه راهبر.
بلوردی اهل ظلم عترتین سالار دامه
چکله زینبی قیزلارلن رهی شامه
سوروسار اولاری یول لاردا چوخلی اهل گذر
جداده رد جواب ایلور اهل اسلامه.
نقدر اولوبدی اوشامین یولوندا رنج تعب
بیلور خدای علیم بیرده حضرت زینب
امام عصردن ایلور قلم حیا یازمور
مجسم ایله اوزون درک ایله ندور مطلب.
سنان و شمریله زجر اولسا پاسبان حرم
دل اهلی اولسا بولر آیری سوز داخی دیمرم
بو اوچ نفر آدی یازدیم گله اله معیار
معاینه ایدور عصرین امامی شرم ایدرم.
بیر آیری مطلب ایدوم قوی بو بزمده چیده
بوسوز نباید اولا اهل عشقه پوشیده
یتشدی بیر گجه اول کاروان رنج بلا
یازولا دیر مسیحایه حال افسرده.
کنار دیرده اوتراق ایدوبدی قوم عنا
حسین ع باشین بیر اوجا نی ده قویدی اهل فساد
گجه نین عالمی مشغول عیش اولوب یکسر
منور اولدی اوباشدان قلوب اهل رشاد
کنار دیره چخوب گوردی مرد نصرانی
اشقلادوبدی حسین باشی دیر ترسانی
تعجبم دیدی بو نور آیت حقدور
پیمران اولول العزمدندی امکانی.
سوال ایدوب دیدی فورا او شیخ
بو قوم کیمدی کیمه منتسبدی عنوانی
دیون بیلوم بو باش هانسی پیمبرون باشیدی
خموش اولوب اوزی روشن ایدوبدی دنیانی.
دیدیله قافله ابن زیاده نسبتی وار
امیر گوفه دی حددن زیاده نخوتی وار
ایدوبدی صاحب بوباشیلن او جنگ عظیم
اولوبدی فاتح ایدوب عترتینی ناقه سوار.
دیدی نه دور بونون آدی ویا نه دور لقبی
آناسی کیمدی کمین نسلیدور نه دورنسبی
دیدی اوز آدی حسیندی آناسی فاطمه دور
آتاسی شیر خدا جدی ص عربی.
دیدی خدا نجه بی شرمدور بو قوم پلید
پیمبرون بلاسین اولدروب بحکم یزید
قویوبلا ایندی حسین باشنی جدا اوسته
امید واردیله عف ایده رسول مجید.
دیدی که عار اولا سیز امت مسلمانه
پیمبر عترتینی سالمسوز بیابانه
اولید حضرت عیسی مسیحون اولادی
گوز اوسته بیز اونی ساخلاریدوخ عزیزانه.
واریمدی ایندی منیم اون مین اشرفی ویررم
سیزه او باشی ولی بیر گجه قوناق ایدرم
قبول ایدوب دیدیلر بو ایشین زیان یوخودی
آلوب او باشی دیدی جان قوناقه بذل ایدرم.
اول او باشه ادبلن دوروب سلام ایلدی
یودی گلابله قانین یوزون تمام ایلدی
دیدی صفا گتوروبسن اویم منور اولوب
بو قوم اگر چه سنه هتک احترام ایلدی
اگر منیله دانشسان آقا قیام ایدرم
آتا آناو تانسام اولارا سلام ایدرم
سنی قسم ویرورم حضرت مسیحایه
دانش منیله آقا گریه ی مدام ایدرم.
اوقدر آغلادی آخر او باشی دیندیردی
ملایکان خدانی او دیره اندیردی
پیمبران اولولعزملن مسیحانین
یانیندا دوردی قوناقین بو نوعی دیندیردی.
عزیز حضرت خیرالورا سنه قربان
مسح وحضرت موسی اولا سنه قربان
بودییرون هرنه یی وارد یولوندا بذل ایدورم
بو جان راهب حسین جاناولا سنه قربان.
کسوک باشون آقاجان شاهد ایلورم اوزومه
فرشته گانیله عیسی نی آغلیان گوزومه
آتان ولیی خدا هم رسول اللهین
بولحظه ایلورم اقرارو محترم اوزومه.
بابان رسول خدانین یانندا ایله گواه
اقول واشهد ان لا اله الا لله
آتان علینون حسینجان ولایتون دیورم
دو باره اشهد ان علی ولی الله.
اولوبدی دیریده راهب قوناقلن همدم
نجه سحر ایلدی زینب اول گجه بولمم
یهودیه قوناق اولسا نلر گلر باشنا
بوحاله که اونی ایندی سالوبدی اهل سلم.
تانمیاندا مسلمان او فاطمه گولودی
امامیدور بورسول خدایه سویگولودی
علی ولیی خدانون اوره گینون بندی
بهشت آقالا رینون بو حسین سروریدی.
اووشدوروب اورگین تا گجه اولوبدی سحر
گوروبدی راهبی اما گوزونده اشگ بسر
گلوبدی حضرت سجاد حضورینه بیر باش
هدیه ایلدی سجاده دیرین یکسر.
دیدی نقدر واریم ملک ومال سیزون اولسون
حسین یولوندا تماما منال سیزون اولسون
نه بلکه مال ومنالیم اوزومده نوکروزم
غلام اولوم آقا جاه جلال سیزون اولسون.
یادوندا ساخلاسن (عباسی ) موقع اوراد
یازاندا شعر آقاندان سن ایله استمداد
هر اول قصیده دکی مهدینون عج شراکتی وار
اولار او شعریده بیر آیری نوع لذت وداد.
حاج عبدالوهاب عباسی
بو ,دیدی ,اهل ,حضرت ,ایدرم ,بیر ,سیزون اولسون ,سنه قربان ,بو قوم ,او باشی ,نه دور
درباره این سایت