زبانحال حضرت زینب به امام حسین بعد از شهادت حضرت علی اصغر
چوخ باخوب اصغره یانما منی یاندورما حسین
اوخلی قربانوی میدانی دولاندورما حسین
ایتمه غم اولمادی سو سولدی الونده گل یاس
گتور اکبر کیمی دوتسون آناسی اصغره یاس
باخوری اهل جفا اصغرون آز باغریوا باس
خیمه ده منتظری واردی یوباندیرما حسین
شعله آهویله قلبیمی آز یاندیر یاخ
غش ایدوبدور آناسی خیمده بیر شیونه باخ
بالاوون قانینی گل بو آغاران زولفیمه یاخ
آتما قانین گویه افلاکی بویاندیرما حسین
سن او قانیله بویاندون منیده قوی بویانوم
گلمسن گلًم اوزوم اولما رضا چوخ دولانوم
قویموری قید محبًت باجون السون دایانوم
چکمه خجلت چکلوب دوره ده یاندورما حسین
نه چکور اصغر آناسی اونی بر لیلی بلر
شیرخواره بالاسین گورمسه ساق قالماز الر
پوزقون احوالوه باخدوقجا بو شام اهلی گولر
دردوی گل منه دی دشمنه آندورما حسین
سوورم برده او غنچه گلی آغوشه آلام
باغلیام حلقینی گهواره سینه برده سالام
ساخلاما عرصه گه رزمده یورقوندی بالام
اوز اوزون یورما مصیبتدن اوساندورما حسین
آفت باد خزان یوز ویروب اول غنچه گله
قورخورام آغلیاسان شاد اولا شام اهلی گوله
گورورم ایستموسن بو غمی اطفال بوله
من ربابه دیرم سن اونی قاندورما حسین
یاتمیوب اوچ گجه گوندوزدی ز بس ایشمیوب آب
سو ویروب زهرلی پیکان ایلیوب ایمدیگه خواب
سو ایچوب اصغری فکر ایلوری بیچاره رباب
یوخلیوب ساخلاما میداندا اویاندورما حسین
بلموری اهل حرم وضعینی قارداش ایشیگون
سو امیدیله چکور الده سو جامی کشیگون
خوردا قیزلار دولانولار باشینا بوش بشیگون
آغلاماقدان بالالار اولدی دایاندورما حسین
گه فرات توسته باخورسان ایدوسن شور و نوا
چاغورورسان بالاوی آلسون ابوالفضلون اخا
الی یوخ قارداشیم عباسین اونی سنن آلا
عذری واردی آتاسی حیدری یاندورما حسین
یانار احوالیوه بیگانه اگر گورسه سنی
آغلاسان آغلادوسان قارداش آنام فاطمه نی
غصه دن باتدی سسیم آغلاما آغلاتما منی
خانه صبریمی بو چولده تالاندورما حسین
یا حسین رفع ایت حسینیدن اوزون بو مرضی
بیر نگاهون اولی مین دکتر عالی عوضی
گوز یاشیدی بو سوزومدن نچه نوکر عوضی
چوخ باخوب اصغره یانما منی یاندورما حسین
مرحوم حسینی سعدی زمان
درباره این سایت